Stjóri McLaren reynir að stilla til friðar

Ron Dennis, stjóri McLaren liðsins í Formúlu 1, vísar því á bug að deilur standi milli ökuþóra liðsins þeirra Fernando Alonso og Lewis Hamilton. Alonso gagnrýndi lið sitt í viðtali við spænska útvarpsstöð á dögunum eftir að Hamilton vann sinn fyrsta sigur í Kanada um síðustu helgi.

Dennis vísar þeim ásökunum Alonso á bug - að liðið sé að gera ungstirninu Hamilton hærra undir höfði því hann sé breti í bresku liði. "Það er heilbrigð samkeppni í liðinu og milli þeirra starfsmanna sem annast bílana. Ég neita því hinsvegar alfarið að annar ökumaðurinn sé tekinn fram yfir hinn. Báðir hafa sama búnað, stuðning og sömu tækifæri til að vinna keppnir," sagði Dennis.

Alonso sagði í útvarpsviðtali að hann hefði fengið óþægilega tilfinningu um leið og hann gekk í raðir McLaren og hefði haft það á tilfinningunni frá fyrstu mínútu að allt yrði gert til að moka undir hinn unga Hamilton.