Ekki ráðlegt að telja á fleiri en einum stað

Það vakti athygli í nótt hve lengi tók að fá lokaniðurstöðu í kosningunum í gær í Norðvesturkjördæmi. Síðustu tölur voru ekki lesnar upp fyrr en tíu mínútum fyrir níu í morgun. Tölur úr öðrum kjördæmum höfðu þá legið fyrir í um tvo klukkutíma. Formaður kjörstjórnar í kjördæminu segir þó óráðlegt að telja á fleiri en einum stað.

Sigurjón Rúnar Rafnsson, formaður kjörstjórnar í Norðvesturkjördæmi segir að tvennt hafi orsakað tafir á talningunni. „Í fyrsta lagi bárust atkvæði mjög seint af Vestfjörðum eða um hálf fjögur í nótt. Í öðru lagi var óvenju mikið af utankjörfundaratkvæðum en langan tíma tekur að vinna úr þeim," segir Sigurjón í samtali við Vísi. Hann segir að um fimmtán prósent atvkvæða í kjördæminu hafi verið greidd utan kjörfundar.

Sigurjón segist ekki hrifinn af hugmyndum um það að telja á fleiri en einum stað. „Ég held að það sé ekki rétt að telja á einum stað, en það er spurning hvort kjördæmið eigi að vera eins og það er", segir Sigurjón og vísar til þess hve víðfemt Norðvesturkjördæmi er. Að hans mati borgar sig ekki að hafa fleiri en einn talningarstað þar sem það gæti orsakað rugling.