Ekki liggur fyrir hvenær endanlegar tölur fást í NV-kjördæmi

Ekki er búist við að endanlegar tölur í Norðvesturkjördæmi liggi fyrir fyrr en í fyrramálið en þar hefur talningin dregist töluvert. Upphaflega var búist að niðurstöður lægju fyrir á milli klukkan sex og sjö en nú er ljóst að það næst ekki.

Sigurjón Rúnar Rafnsson, formaður kjörstjórnar, segir ástæðurnar fyrir þessum töfum þær að kjörgögn hafi verið lengi að skila sér frá öllum stöðum í kjördæminu og þá eigi eftir að fara yfir utankjörfundaratkvæði. Þau eru um þrjú þúsund talsins sem er óvenju mikið.

Reiknað er með að lokið verði við að telja upp úr kjörkössum klukkan sjö en þá á eftir að fara yfir utankjörfundaratkvæðin.

Von er á tölum úr Suðurkjördæmi innan skamms en búið er að telja í Reykjavíkurkjördæmunum tveimur og Suðvesturkjördæmi.