Telur frjálslynda eiga mikið inni

Guðjón Arnar Kristjánsson, formaður Frjálslynda flokksins, segir stöðuna núna vera vonbrigði fyrir flokkinn. Hann gerir sér hins vegar vonir um að staðan muni breytast þegar líða tekur á nóttina.

„Í síðustu kosningum breyttist margt á síðasta sprettinum. Það er ekkert sem útilokar að slíkt gerist aftur," sagði Guðjón Arnar Kristjánsson, formaður Frjálslynda flokksins, í samtali við Vísi. „Ég á von á því að staðan í Norðvesturkjördæmi eigi eftir að breytast töluvert og að við náum inn tveimur mönnum þar."

Samkvæmt nýjustu tölum nær Kristinn H. Gunnarsson, annar maður á lista Frjálslynda flokksins í Norðvesturkjördæmi, ekki inn á þing. Flokkurinn er nú með 11.9 prósent atkvæða í kjördæminu og 6,9 á landsvísu.