Hagnaður TM eykst

Tryggingamiðstöðin skilaði hagnaði upp á 886 milljónir króna á fyrsta ársfjórðungi samanborið við 626 milljónir króna á sama tíma í fyrra. Rekstrartap af vátryggingastarfsemi nam fimm milljónum króna sem er talsverður viðsnúningur frá síðasta ári þegar tapið nam 215 milljónum króna.

Í uppgjör Tryggingamiðstöðvarinnar kemur fram að bókfærð iðgjöld hafi ríflega tvöfaldast á milli ára og námu þau 8.675 milljónum króna samanborið við 4.082 milljónir króna á sama tíma í fyrra.

Rekstrarhagnaður nam 1.369 milljónum króna á tímabilinu samanborið við 1.150 milljónir króna á fjórða ársfjórðungi í fyrra.

Eigið fé samstæðu Tryggingamiðstöðvarinnar minnkaði lítillega á milli ára. Það nam tæpum 21,3 milljörðum króna í lok fjórðungsins nú samanborið við tæpa 22 milljarða krónur í lok fyrsta ársfjórðungs í fyrra.

Heildareignir Tryggingamiðstöðvarinnar námu 73.812 milljónum króna í lok tímabilsins og jukust þær um sex prósent frá áramótum.

Þá kemur fram að norska vátryggingarfélagið Nemi hafi orðið hluti af Tryggingamiðstöðinni frá byrjun september í fyrra og hafi áhrif á samanburð rekstrar og efnahags Tryggingamiðstöðvarinnar.

Óskar Magnússon, forstjóri Tryggingamiðstöðvarinnar, segir í uppgjörinu, að áframhaldandi vöxtur vátryggingastarfsemi einkenni starfsemi félagsins á Íslandi en að tjónaþróun tveggja vátryggingagreina á Íslandi sé enn áhyggjuefni. „Tap er enn af slysatryggingum sjómanna og hafa þær ráðstafanir sem gripið var til á árinu 2006 ekki skilað sér að öllu leyti. Tjónaþróun í greininni er sérstakt áhyggjuefni. Frjálsar ökutækjatryggingar eru reknar með tapi en gripið var til ráðstafana til að snúa þeirri þróun við undir lok ársins 2006," segir hann.