Raul vill ekki fara frá Real Madrid

Gulldrengurinn Raul hjá Real Madrid segist alls ekki vilja fara frá Real Madrid og ætlar að efna þau þrjú ár sem hann á eftir af samningi sínum. Nokkuð hefur verið ritað um Raul í spænskum miðlum undanfarið og því jafnvel haldið fram að hann væri á förum.

"Ég hef ekki heyrt neitt frá félaginu þess efnis að það vilji selja mig svo ég er alveg rólegur. Hér vil ég vera áfram og ég á þrjú ár eftir af samningnum mínum. Þessar sögusagnir sem verið hafa á kreiki hljóta að koma til af því að einhver vill að ég fari frá félaginu, en ég er eins hollur því og ég hef alltaf verið," sagði Raul og sagðist finna sig betur með liðinu um þessar mundir því hann væri farinn að spila gömlu stöðuna sína á ný.

"Capello (þjálfari) lét mig spila sem framliggjandi miðjumann á tímabili, en því nær sem ég er markinu, því betri er ég. Mér er samt sama þó þjálfarinn tefli mér fram annarsstaðar, því ég vil gera það sem er best fyrir liðið," sagði hinn 29 ára gamli Raul.