Minni hagnaður hjá Félagsbústöðum

Talsvert minni hagnaður var af rekstri Félagsbústaða í fyrra en árið á undan. Hagnaðurinn í fyrra nam 836 milljónum króna samanborið við rúma 4,6 milljarða krónum árið á undan. Félagsbústaðir eru hlutafélag í eigu Reykjavíkurborgar og á og rekur félagslegt leiguhúsnæði sem úthlutað er af Velferðarsviði Reykjavíkurborgar.

Í uppgjöri félagsins segir hins vegar að tap varð af rekstri Félagsbústaða í fyrra fyrir matsbreytingu og söluhagnað fjárfestingaeigna. Tapið nemur 458 milljónum króna, sem er talsvert meira en árið 2005 þegar tapið nam 218 milljónum króna. Aukið rekstrartap félagsins á árinu skýrist af hækkun verðbóta langtímalána en þær jukust um 80 prósent á milli ára, að því er fram kemur í uppgjörinu.

Félagsbústaðir keyptu 249 íbúðir í fyrra. Þar af voru 124 þjónustuíbúðir keyptar af Reykjavíkurborg ásamt þjónusturými í tveimur þjónustkjörnum fyrir aldraða að Dalbraut 21-27 og Norðurbrún 1. Á móti voru seldar 25 íbúðir og er því fjölgun almennra leiguíbúða 100 á árinu. Félagsbústaðir áttu í lok síðasta árs 1.963 íbúðir en þar af eru 296 þjónustuíbúðir fyrir aldraða.

Rekstrarhagnaður félagsins nam 753 milljónum króna í fyrra samanborið við 539 milljónir króna árið á undan.

Eigið fé Félagsbústaða jókst um 881 milljón á milli ára en það jókst úr rétt rúmum 11,1 milljarði króna í rétt tæpa 12 milljarða. Eiginfjárhlutfall lækkaði hins vegar úr 49,1 prósenti í 45,1 prósent á tímabilinu.

<a href="http://news.icex.is/newsservice/MMIcexNSWeb.dll/newspagepf?language=is&pagetype=&primarylanguagecode=is&newsnumber=37041"  target="new_">Ársuppgjör Félagsbústaða</a>