Kveikt í flugeldum og tertum inni í bíl

Bifreið á Akureyri skemmdist mikið að innan í gær eftir að kveikt hafði verið í flugeldum og tertum inni í henni. Fram kemur í frétt frá lögreglunni á Akureyri að eigandi bílsins hafi skilið bílinn eftir fyrir utan húsnæði Bílaklúbbs Akureyrar við Frostagötu aðfaranótt sunnudags, en í aftursætinu voru nokkrar tertur og flugeldar.

Morguninn eftir þegar maðurinn vitjaði bílsins var búið að brjóta rúðu í honum og skjóta upp tertunum og flugeldunum inni í bílnum. Er bifreiðin mikið skemmd að innan að sögn lögreglu og mildi að ekki hafi kviknað í henni. Lögregla óskar eftir upplýsingum um mannaferðir og annað sem gæti hjálpað til við að upplýsa málið.