Kanoute vill verða markakóngur

Malímaðurinn Freddy Kanoute hjá Sevilla segist hafa sett stefnuna á að verða markakóngur í spænska boltanum, en hann hefur skorað 14 mörk til þessa í deildinni og er markahæstur. Næstur kemur Ronaldinho hjá Barcelona með 12 mörk.

"Þegar ég kom til Sevilla virtist það algjörlega ómögulegt að ætla sér að verða markakóngur á Spáni, en nú sé ég að það er gerlegt. Ég mun halda áfram að leggja mig allan fram og tek einn leik fyrir í einu. Þetta hefur verið mitt besta tímabil til þessa sem atvinnumaður, en tímabilið er ekki nema hálfnað og því getur allt gerst," sagði Kanoute, sem áður lék með West Ham og Tottenham í ensku úrvalsdeildinni en náði aldrei að festa sig í sessi á Englandi.