Heimsækja Hreindýraland

Alþjóðlega kvikmynda- og vídeó­listahátíðin 700.is Hreindýraland verður haldin í annað sinn á Austur­landi í lok mánaðarins. Hátíðin er vettvangur fyrir tilraunakvikmyndir og vídeólist en myndirnar koma hvaðanæva að. Um 500 myndir bárust aðstandendum hátíðarinnar sem höfðu því úr nægu að moða þegar kom að því að móta dagskrána. Myndirnar verða sýndar víða um Austurland.

Hátíðin stendur í eina viku og hefst með uppákomu og glæsilegri dagskrá í Sláturhúsinu á Egilsstöðum 23. mars næstkomandi en daginn eftir verður efnt til heimildarmyndasýninga á Skriðuklaustri í samvinnu við Gunnarsstofnun. Þar verður einnig listamannaspjall þar sem myndlistarmennirnir Steina Vasulka, Rúrí og Finnbogi Pétursson munu taka þátt.

Auk myndasýninganna verða haldin námskeið og fyrirlestrar fyrir lærða sem leikna - til dæmis geta áhugasamir byrjendur lært undirstöðuatriði vídeólistar Hátíðin er opin öllum og ókeypis á alla viðburði.

Nánari upplýsingar er að finna á heimasíðunni www.700.is