Stelpurnar, Strákarnir og Svínasúpan fá gulldisk

Nýútkomnir DVD-diskar með grínþáttunum Stelpunum, Strákunum og Svínasúpunni hafa náð þeim áfanga að hafa selst í yfir 5 þúsund eintökum. Af því tilefni verður leikurum og aðstandendum þessara skemmtilegu grínþátta, sem sýndir voru á Stöð 2, afhentir gulldiskar á morgun laugardag.

Afhendingin fer fram í húsnæði Hjálparstarfs kirkjunnar og Mæðrastyrksnefndar Reykjavíkur að Sætúni 8 (gamla Kaaber-húsinu) kl. 13.

Sem smáræðis þakklætisvott fyrir þessa frábæru viðtökur sem útgáfurnar hafa hlotið hefur verið ákveðið að færa Mæðrastyrksnefnd eintök af þessum vinsælu diskum og spurningaspilið Meistarann til að gefa þeim fjölskyldum sem eiga um sárt að binda og neyðast til að leita aðstoðar við að halda jólin.

Þetta er ennfremur gert til að minna sérstaklega á það góða og mikilvæga starf sem Mæðrastyrksnefnd vinnur í þágu íslensks samfélags á aðventunni.

Fulltrúar frá Mæðrastyrksnefnd munu veita gjöfunum viðtöku úr hendi Strákanna, Stelpnanna og Svínasúpugengisins að lokinni gullplötuafhendingunni.