Nýr yfirmaður Vodafone í Evrópu

Vittorio Colao hefur verið ráðinn sem nýr yfirmaður farsímarisans Vodafone í Evrópu. Hann hefur störf í október. Colao tekur við að Bill Morrow, fyrrum yfirmanni Vodafone, sem lét af skyndilega af störfum hjá farsímarisanum af persónulegum ástæðum í júlí.

Colao, sem er ítalskur, er forstjóri ítalska fjölmiðlafyrirtækisins RCS Media Group en hafði áður gegnt ýmsum stöðum hjá Vodafone. M.a. var hann yfirmaður farsímarisans á Ítalíu, í Suður-Evrópu, Miðausturlöndum og í Afríku. Auk starfsins hjá Vodafone mun Colao sömuleiðis taka við stöðu framkvæmdastjóra hjá fyrirtækinu af Julian Horn-Smith, sem sömuleiðis hætti störfum fyrir skömmu.

Fjárfestar segja ráðningu Colaos jákvætt skref fyrir Vodafone og geti svo farið að hann taki við af Arun Sarin, forstjóra farsímarisans síðastliðin þrjú ár en Sarin hefur verið undir miklum þrýstingi vegna slakrar afkomu fyrirtæksins sem hefur haft áhrif á gengi hlutabréfa í farsímarisanum.

Gengi hlutabréfa í Vodafone hækkuðu um 0,4 prósent í Kauphöllinni í Lundúnum í Bretlandi í dag vegna frétta um ráðninguna og standa nú í 114,5 pensum á hlut.