Uppskera og handverk sett

Uppskera og Handverk 2006 að Hrafnagili sett í gær með viðhöfnBjarni Kristjánsson sveitarstjóri setti sýninguna og Jón Marinó Jónsson sagði sögu einnar fiðlu. Þar á eftir var frumflutningur á fiðlu Jóns Marinós.

Fjölmargir sóttu sýninguna á fyrsta degi og var hún afar litrík. Sýningarsvæði handverksfólks er á yfir eitt þúsund fermetra svæði - ýmist inni í Hrafnagilsskóla og á útisvæði. Þema hátíðarinnar er tónlist og fjölmargir listamenn munu koma fram. Sérstakt verksvæði handverksmanna telur yfir 30 handverksmenn að störfum við mótun úr hinum ýmsu hráefnum.

Það þurfti ansi margar hendur við uppreisn Bergþórs risa sem sjá má á mynd meðfylgjandi fréttinni. Risinn er hvorki meira né minna en hálft tonn að þyngd, hátt á þriðja metra á hæð og verður í vinnslu á hátíðinni. Bergþór mun fara af hátíðinnni á framtíðarstað sinn við Geysi í Haukadal. Auk Bergþórs þá er stærsti rafmagnsgítar til sýnis sem smíðaður hefur verið á Íslandi, yfir 4 metrar á hæð. Gítarinn var smíðaður sérstaklega í tenslum við hátíðina og er eftirlíking gítars af gerðinni Fender Telecaster.

Yfir 70 sýnendur hafa stillt vörum sínum fallega upp á sölubásum og í aðalsal hátíðarinnar er risastór tískusýningarpallur klæddur með tryppahúðum, hreindýraskinnum og kýrhúðum. Á hátíðinni kennir ýmissa grasa og allir ættu að finna eitthvað við sitt hæfi s.s tónlist, dýrasýning, rennismiðir, hljóðfærasmiðir, leirkerasmiðir, hörpuleikari, eldsmiður, grænmeti, traktorar, landssýning landnámshænsna, handverksbíllinn, tálgun, vinnsla horna og beina, hoppukastali og tónlistarfólk.

Í tengslum við hátíðina verða tónleikar í Laugarborg hjá Steindóri Andersen, Báru Grímsd og Didda fiðlu á morgun föstudagskvöld og á sunnudagskvöld verða tónleikar með Michael Black í Laugarborg en hann kemur úr frægri írskri þjóðlagafjölskyldu.