Olíuverð lækkaði í dag

Verð á olíu lækkaði á helstu mörkuðum í dag í kjölfar þess að orkumálaráðuneyti Bandaríkjanna birti gögn þess efnis að olíubirgðir landsins hefðu aukist. Þetta er þvert á það sem áður var talið.

Verð á olíu, sem afhent verður í júlí, lækkaði um 81 sent á markaði í New York í Bandaríkjunum og endaði í 70,95 dölum á fatið. Olía, sem afhent verður í næsta mánuði, lækkaði hins vegar um rúm 4 sent.

Þá lækkaði verð á Norðursjávarolíu um 1 dal og endaði í 70 dölum á fatið á markaði í Lundúnum í Bretlandi.

Orkumálaráðuneytið birtir upplýsingar um olíubirgðir landsins vikulega. Í þeim kemur fram að hráolíubirgðir landsins hafi dregist saman um 3 milljónir tunna í síðustu viku en þær nema nú 343,9 milljónum tunna. Þetta er þremur prósentum minna en á sama tíma á síðasta ári. Þá dróst olíuinnflutningur til Bandaríkjanna saman um 800.000 tunnur á dag.

Þá jukust eldsneytisbirgðir í Bandaríkjunum um 2,1 milljón tunnu. Heildarbirgðir eldsneytis nema nú 208,5 milljónum tunna og er það rétt um þremur prósentum minna en á sama tíma í fyrra.

Þá jukust sömuleiðis birgðir af dísel- og húshitunarolíu um 2,5 milljónir tunna og nema heildarbirgðirnar 117,1 milljón tunna í Bandaríkjunum. Þetta er 8 prósentum meira magn en á sama tíma í fyrra.

Eftirspurn eftir olíu það sem af er þessu ári nam 9,24 milljónum tunna á dag í Bandaríkjunum og er það svipuð eftirspurn og í fyrra. Má af því ætla að verðhækkanir á olíu hafi orðið til þess að neytendur haldi að sér höndum við eldsneytiskaup vestra.