Methagnaður hjá Kaupþing banka

Hagnaður Kaupþing banka nam 18,8 milljörðum króna á fyrsta ársfjórðungi 2006. Á sama tíma á síðasta ári nam hagnaðurinn 11,1 milljarði og er aukningin 69,5 prósent á milli ára. Hagnaður á hlut var 28,3 krónur en hann var 17 krónur á fyrsta ársfjórðungi 2005. Þetta er methagnaður í sögu bankans.

Hagnaður Kaupþings banka fyrir skatta nam 22,18 milljörðum króna á fyrsta fjórðungi. Þetta er rúmum 7,8 milljörðum króna en á sama tíma í fyrra.

Rekstrartekjur Kaupþings banka námu tæpum 35,5, milljörðum króna og er það 59,5 prósenta aukning á milli ára. Þar af námu rekstrartekjur breska bankans Singer & Friedlander rúmum 3,9 milljörðum króna á fyrsta ársfjórðungi. Í tilkynningu frá bankanum segir að það skýri hluta aukningarinnar.

Hreinar vaxtatekjur Kaupþings banka á fyrsta ársfjórðungi 2006 námu tæpum 10,5 milljörðum króna og jukust þær um 48,8 prósent á milli ára. Þar af námu hreinar vaxtatekjur vegna Singer & Friedlander 1.9 milljörðum króna. Þá námu hreinar þóknanatekjur á fyrsta ársfjórðungi 8,6 milljörðum króna og er það 94,1 prósentu aukning frá sama tímabili í fyrra. Í tilkynningu frá bankanum kemur fram að aukningin skýrist annars vegar af tilkomu Singer & Friedlander inn í samstæðuna og hins vegar að af auknum þóknanatekjum hjá öllum afkomusviðum bankans.

Gengishagnaður á fyrsta ársfjórðungi nam 13,5 milljörðum króna og jókst um 99,3 prósent miðað við sama tímabil í fyrra. Ástæða hækkunarinnar er mun hagstæðara markaðsumhverfi á norrænum fjármálamörkuðum en á sama ársfjórðungi í fyrra, auk sölu bankans á öllum eignarhlut sínum í Baugi Group hf.

Launakostnaður bankans á fyrstu þremur mánuðum ársins nam 7,4 milljörðum króna og jókst um 86,4 prósent frá sama tímabili í fyrra. Hækkunin skýrist að mestu af fjölgun starfsmanna en þeim fjölgaði um 843 á milli ára og voru 2.449 í lok marsmánaðar. Tilkoma Singer & Friedlander í samstæðuna skýrir að mestu leyti þá fjölgun stöðugilda sem orðið hefur á milli ára en alls störfuðu þar 519 starfsmenn í lok mars 2006.