Standard & Poor's tilkynnir A- lánshæfismat Glitnis

Matsfyrirtækið Standard & Poor's tilkynnti í dag um lánshæfismat Glitnis og gefur matseinkunnina A- fyrir langtímaskuldbindingar og A-2 fyrir skammtímaskuldbindingar. Horfurnar eru stöðugar, að mati Standard & Poor's.

Glitnir er fyrstur íslenskra banka til að fá lánshæfismat hjá Standard & Poor's, að því er fram kemur í tilkynningu til kauphallarinnar.

Þá segir að samkvæmt Standard & Poor's endurspegli matið sterka stöðu Glitnis á innanlandsmarkaði og bætta dreifingu í eignasafni bankans með vaxandi starfsemi bankans í Noregi. Einnig er minnst á þann góða hagnað sem hefur verið í rekstri bankans á liðnum árum og almenn gæði eignasafnsins. Þá segir Standard & Poor's þá þætti sem vegi neikvætt við ákvörðun um lánshæfisflokk vera þá að bankinn hafi nokkra tiltölulega stóra lántakendur, hraðan vöxt eigna samhliða stefnumörkun sem mögulega eykur áhættu og það hvað heildsölumarkaður vegur þungt í fjármögnun bankans í erlendum myntum.

Þá er haft eftir Bjarna Ármannssyni, forstjóra Glitnis, að bankinn sé ánægður með matið og að Glitnir sé nú kominn í „A flokk" hjá þremur stærstu lánshæfisfyrirtækjunum. „Gæði eignasafnsins og traust áhættustýring sýna vel styrk bankans og endurspeglast í þessu mati. Kaupin á BNbank í Noregi hafa enn bætt eignasafnið eins og S&P bendir á. Við trúum því að við getum haldið áfram að vaxa og auka hagnað Glitnis í samræmi við stefnumörkun bankans og þetta mat styður það," segir Bjarni.

Tómas Kristjánsson, framkvæmdastjóri fjármálasviðs, segir jafnframt: „Lánshæfismatið er í samræmi við okkar væntingar, með hliðsjón af annars vegar lánshæfismati íslenska ríkisins og hins vegar annarra norrænna banka. Glitnir fær mat sem er einu þrepi neðan við norræna banka á borð við SEB og Swedbank. Það er sami munur og er milli Glitnis og norrænu bankanna hjá hinum lánshæfismatsfyrirtækjunum (sjá töflu). S&P bendir á að fjárstýring Glitnis sé góð en vekur athygli á því hve bankinn reiðir sig á erlenda lánsfjármögnun á mörkuðum. Á það hefur áður verið bent af öðrum lánshæfismatsfyrirtækjum. Til að mæta þessu hefur bankinn lágmarkað áhættuna með því að breikka markvisst hóp skuldabréfafjárfesta og lánveitenda."