Pfaff snýr aftur til uppruna síns

Pfaff er fjölskyldufyrirtæki af bestu gerð og að öllu leyti í eigu fjölskyldu Margrétar Kristmannsdóttur framkvæmdastjóra. Afi hennar, Magnús Þorgeirsson, stofnaði fyrirtækið árið 1929 í því miði að flytja inn saumavélar. Síðar tók pabbi hennar, Kristmann Magnússon, við og loks hún sjálf fyrir um tíu árum síðan. Hún hefur þó ekki lifað og hrærst innan veggja Pfaff alla sína ævi. Það var ekki fyrr en hún var að nálgast þrítugt og hafði lokið viðskiptafræðinámi og MBA-námi erlendis sem hún ákvað að slást í hóp með fjölskyldunni.

Ráðið frá nafnabreytingu

Fyrir rétt um hálfu ári síðan tóku eigendur Pfaff-Borgarljóss ákvörðun um að endurskoða nafn fyrirtækisins með það að leiðarljósi að finna nafn er endurspeglaði betur starfsemi fyrirtækisins. „Við keyptum Borgarljós árið 2002 og við það voru nöfn fyrirtækjanna lögð saman eins og svo oft er gert. Þegar okkur þótti orðið víst að fólk vissi að Borgarljós væri komið hingað fórum við að velta því fyrir okkur að endurskoða nafnið og fengum AP-almannatengsl til liðs við okkur. Mikil vinna var lögð í þetta og ég las meðal annars íslenska og latneska orðabók spjaldanna á milli,“ segir Margrét. Það kom hins vegar ljós að ýmsir álitsgjafar réðu þeim eindregið frá því því að varpa þeirri ímynd sem Pfaff ber með sér fyrir róða. „Við sáum fljótt að fyrirtækið hefur á sér mjög gott orð og að það væri ekki rétt að skipta um nafn. Við ákváðum því að leita aftur til upprunans og halda okkur við það nafn sem við höfum verið að markaðssetja í áttatíu ár og þykir mjög vænt um.“

Allt frá sprengiefni til saumavéla

Rekstur Pfaff hefur tekið stakkaskiptum frá stofnun fyrirtækisins. Ýmsar vörur hafa þar verið til sölu og fókusinn í rekstrinum hefur sveiflast með tíðarandanum. Þannig mátti til að mynda um árabil nálgast sprengiefni, barnavagna og marmarasalla hjá Pfaff. Undanfarin ár, eða allt frá því að Borgarljós voru keypt árið 2002, hafa fleiri minni fyrirtæki og umboð verið tekin yfir og þróunin verið hröð upp á við. Í dag eru áherslur í rekstrinum einkum á fimm sviðum; ljósum, raftækjum, saumavélum, hljóðvörum og símabúnaði. Um leið og nafnabreytingin var gerð var hannað nýtt logo fyrir fyrirtækið þar sem þessir fimm meginþættir koma skýrt fram.

Rúmlega tuttugu sérhæfðir starfsmenn vinna hjá Pfaff. „Við leggjum mikið upp úr því að vera með starfsfólk sem hefur mikla fagkunnáttu og sérþekkingu,“ segir Margrét. „Gæfa í þessu fyrirtæki er starfsfólkið – á því er enginn vafi – enda hefur sumt þeirra verið hér áratugum saman. Það skiptir öllu máli að vera með fólk sem hefur áhuga á vinnunni sinni og maður getur treyst á. Þó að yfirbygging á fyrirtækinu sé mjög lítil og flestir þræðir fyrirtækisins fari í gegnum mig tel ég mitt aðalstarf vera að skapa þannig umhverfi að starfsfólkið hafi áhuga á því sem það er að gera. Ef starfsfólkið er áhugasamt leitar það uppi nýjar leiðir til að gera hlutina og hefur áhuga á því að sjá fyrirtækið stækka og dafna. Þannig helst fyrirtæki í stöðugri þróun, enda er stöðnun algjört eitur og oft upphafið að endalokunum.“