HugurAx kaupir Mekkanis

HugurAx hefur keypt Mekkanis hugbúnaðarstofu. Eigendur fyrirtækjanna skrifuðu undir samning þess efnis fyrir stuttu og verða félögin sameinuð í framhaldinu.

Fimm manns starfa hjá Mekkanis en 130 hjá HugarAxi.

Gunnar Ingimundarson, forstöðumaður HugarAx, segir kaupverð trúnaðarmál. Fyrirtækin hafi átt samstarf á sviði hugbúnaðar- og viðskiptalausna. Mekkanis hafi sérhæft sig í mikilvægum lausnum í miðju lagi hugbúnaðarkerfa. „Þessir hlutir skipta miklu máli,“ segir Gunnar og bendir á að auk þessa hafi Mekkanis tekið að sér þróunarverkefni fyrir HugAx, sem fólst í að endurskrifa Ópusallt viðskiptalausnir fyrir .NET umhverfi Microsoft, sem sé mikilvægt í tölvuumhverfi nútímans, að sögn Gunnars.

Hann segir ennfremur að Mekkanis hafi aflað sér ákveðinnar lykilþekkingar í .NET umhverfi auk samþættingar og verkferla í fyrirtækjum hvers konar. „Fyrirtækið var til þess fallið að styrkja HugarAx enda sáum við verulegan ávinning í lykilþekkingu Mekkanis. Því var ákveðið að ganga til samninga,“ segir Gunnar.