Árvakur tapaði í þriðja skipti á fimm árum

Árvakur, útgáfufélag Morgunblaðsins, tapaði 187 milljónum króna í fyrra samanborið við 358 milljóna króna hagnað árið áður. Þetta er í þriðja skipti á síðustu fimm rekstrarárum sem tap verður á rekstri fyrirtækisins.

Rekstrartekjur félagsins námu 3.262 milljónum króna og drógust saman um 7,5 prósent á milli ára. Mestu munar um að árið 2004 féll til söluhagnaður af fasteign við Kringlu. Að öðru leyti jukust tekjur Árvakurs af hefðbundinni starfsemi, svo sem áskriftar- og auglýsingasölu, prentun og dreifingu. Lausasala blaðsins dróst hins vegar saman um átta prósent.

Rekstargjöld námu 3.329 milljónum króna og hækkuðu um 8,6 prósent frá fyrra ári. Launakostnaður, sem er vel rúmur helmingur af útgjöldum, hækkaði um fimm prósent.

Rekstrartap fyrir afskriftir (EBITDA) nam 66 milljónum króna samanborið við tæplega 462 milljóna króna rekstarhagnað árið 2004.

Eignir Árvakurs stóðu í rúmum 3,7 milljörðum króna í árslok og hækkuðu um tæpt prósent.

Meðal eigna er helmingshlutur í Ár og degi, útgáfufélagi Blaðsins, sem var bókfærður á 115 milljónir króna. Hluturinn var keyptur í árslok 2005 en samkvæmt skilmálum í kaupsamningi getur kaupverðið orðið allt að 250 milljónir króna til ársins 2008.

Eigið fé félagsins var 1.232 milljónir króna í lok árs 2005 og dróst saman um 9,5 prósent. Eiginfjárhlutfall var því yfir 33 prósent.

Í lok árs var Útgáfufélagið Valtýr stærsti hluthafinn með 21 prósents hlut en nokkrar breytingar hafa orðið á eigendahópi Árvakurs í ár. Meðal annars hafa stærstu hluthafarnir, Valtýr og félög í eigu Ólafs Jóhanns Ólafssonar og Straums-Burðaráss, styrkt stöðu sína. Þá keypti Ólafsfell, félag Björgólfs Guðmundssonar, átta prósenta hlut í Árvakri á dögunum.