Stöð 2 verði efld

Efling ljósvakamiðla 365 er meðal þess sem stjórnendur Dagsbrúnar horfa til nú þegar unnið er að uppskiptingu félagsins í tvo hluta, 365 hf. og Teymis hf. Er þar aðallega horft til Stöðvar 2 þar sem stjórnendur félagsins sjá aukna vaxtarmöguleika en alls mun einn þriðji hluti eigna Dagsbrúnar falla í fjölmiðlahlutann.

Að öðru leyti mun ekki vera á dagskránni að fara út fyrir þá kjarnastarfsemi sem nú er fyrir hendi heldur huga að þeim fjölmiðlum sem 365 starfrækir.

Enn er ekki komið á hreint hver verður stjórnarformaður 365 en víst þykir að Þórdís Sigurðardóttir, stjórnarformaður Dagsbrúnar, taki við stjórnarformennsku í Teymi, fjarskiptahlutanum. Talið er líklegt að þar gæti innanbúðarmaður hreppt hnossið og hefur jafnvel verið rætt um að Jón Ásgeir Jóhannesson taki sjálfur sæti í stjórn 365.