Verð hækkar hér en lækkar annars staðar

Norrænn samanburður sýnir að GSM þjónusta hækkar í verði á Íslandi meðan hún lækkar á hinum Norðurlöndunum. Þetta er meðal niðurstaðna nýrrar samnorrænnar skýrslu eftirlitsstofnana á fjarskiptamarkaði. Farsímamarkaðurinn hér er sagður einkennast af fákeppni.

Skýrslan var samin til að meta áhrif reglugerða á markaðsþróun og samkeppni til þess að hægt væri að meta reynsluna og árangur eftir þörfum. Vinnan við skýrsluna var sett af stað á sameiginlegum fundi forstjóra systurstofnana Póst- og fjarskiptastofnunar á Norðurlöndunum í byrjun nóvember í fyrra.

Hvað varðar íslenska markaðinn þá eru meginniðurstöður þær að hann einkennist af fákeppni, þar sem tvö fjarskiptafyrirtæki skipta markaðnum á milli sín og hefur Síminn 65 prósenta markaðshlutdeild og Og Vodafone hefur 35 prósenta markaðshlutdeild, segir í frétt PFS og bent er á að verð til neytenda fyrir farsímaþjónsutu hafi hækkað hér frá árinu 2002 á meðan það hafi lækkað á hinum Norðurlöndunum.

Þessi staða er áhyggjuefni. Viðbrögð Póst- og fjarskiptastofnunar eru þau helst að hlutast til um lækkun og jöfnun lúkningaverðs farsímafyrirtækjanna og leggja aðgangskvöð á Símann til að auðvelda nýjum þjónustuaðilum leið inn á markaðinn, segir þar jafnframt.

Í tilkynningu sem Síminn sendi frá sér í gær er á það bent að í samanburðinum sé ekki tekið tillit til afsláttarkjara sem viðskiptavinum bjóðist, svo sem ókeypis hringingum í valin númer, auk þess sem landið hafi verið með þeim ódýrari í heiminum í símakostnaði í könnunum OECD.