Kaupa réttinn á hellisbúanum

Leikhúsmógúllinn ehf., sem hefur frá árinu 2000 framleitt og kynnt leikritið Defending the Caveman (eða Hellisbúann) á meginlandi Evrópu, hefur nú keypt höfundarréttinn af höfundi leikritsins, Rob Becker.

„Með kaupunum hefur félagið tryggt sér öll hugverkaréttindi tengd leikritinu alls staðar í heiminum,“ segir í tilkynningu, en á næstu misserum verður áhersla lögð á framleiðslu leikritsins á Bandaríkjamarkaði og í Canada auk áframhaldandi útbreiðslu í Evrópu. „Yfir 6 milljónir manna hafa séð Hellisbúann og leikritið er í dag sýnt í yfir 30 löndum á 20 tungumálum.“

Brú II Venture Capital Fund tók þátt í að fjármagna kaupin á réttindunum með kaupum á hlut í Leikhúsmógúlnum. Heildarfjármögnun Leikhúsmógúlsins nam 12 milljónum Bandaríkjadala.

Brú II Venture Capital Fund er nýr fjárfestingasjóður sem fjárfestir í óskráðum og ört vaxandi fyrirtækjum, en að sjóðnum standa íslenskir fagfjárfestar. Brú II er nýr sjóður Brúar, en Brú stýrir tveimur öðrum eignasöfnum, Brú Framtaki og eignasafninu BVC (Brú I). Í eignasafni Brúar eru félög hér á landi, í Bandaríkjunum og í löndum Evrópusambandsins.