Risakauphöll góður kostur

Sameining Kauphallar Íslands við norrænu kauphallasamstæðuna OMX, NASDAQ-markaðinn í New York og Kauphöllina í Lundúnum er góður kostur, að mati Þórðar Friðjónssonar, forstjóra Kauphallarinnar.

Kauphöllin hefur átt í viðræðum um sameiningu við OMX, en orðrómur hefur verið uppi um að NASDAQ hyggist taka yfir OMX. NASDAQ á nú þegar fjórðungshlut í Kauphöllinni í Lundúnum og er búist við því að fullri yfirtöku verði brátt lokið. Sú staða gæti því komið upp að Kauphöllin yrði útibú alþjóðlegrar risakauphallar á Íslandi.

"Íslendingar hafa fjárfest langmest í Bretlandi og Bandaríkjunum auk Norðurlandanna. Á þessum mörkuðum eru svipuð viðhorf og vinnubrögð þannig ég hef ekkert nema gott um það að segja ef að sameiningu yrði," segir Þórður Friðjónsson.

Þórður telur augljóst að sýnileiki skráðra félaga verði meiri eftir því sem markaðssvæðið er stærra, auk þess sem auðveldara verði að laða að erlenda fjárfesta "Hér yrði þó eftir sem áður kauphöll sem starfar samkvæmt reglum íslenskra stjórnvalda. Okkar hagsmuna yrði gætt gaumgæfilega í hvers konar samstarfi."

Viðræður við OMX eru vel á veg komnar, að sögn Þórðar, og má vænta niðurstöðu fyrir árslok.