Exista nærri yfirtöku í Bakkavör

Exista keypti í gær rúmlega 6,5 prósenta hlut í Bakkavör og á nú tæplega 39 prósenta hlut í félaginu, en það er nærri yfirtökumörkum.

Exista keypti 142,2 milljónir hluta á genginu 55. Heildarvirði viðskiptanna er því rúmir 7,8 milljarðar króna.

Exista er stærsti einstaki hluthafinn í Bakkavör. Aðrir stórir hluthafar eru Lífeyrissjóður Verslunarmanna og Lífeyrissjóðurinn Gildi sem hvor um sig eiga rúmlega sex prósenta hlut.

Bræðurnir Ágúst og Lýður Guðmundssynir eiga samanlagt tæplega helmingshlut í Exista. Exista á rúman fjórðungs hlut í KB banka auk þess að vera stærsti einstaki eigandi Símans með um 44 prósenta eignarhlut.