Sigu niður hæsta foss landsins

Félagar úr björgunarsveitinni Suðurnes í Keflavík sigu niður hæsta foss Íslands, Glym í Botnsá í Hvalfirði, síðasta laugardag en ekki er vitað til þess að nokkur hafi lagt í slíka svaðilför fyrr enda er fossinn nærri tvö hundruð metrar á hæð.

Lagt var upp fimm um morguninn því örðugt er að komast að fossinum og þurfti hópurinn að ganga síðustu þrjá kílómetrana með 180 kíló af búnaði. „Það voru tveir minni stallar sem við sigum að fyrst til að koma fyrir tryggingum og slíku en svo létum við vaða niður fossinn,“ segir Haraldur Haraldsson, annar sigmannanna. „Tilfinningin var mjög góð en þetta var líka mjög erfitt og hættulegt, þetta tók svakalega á – ekki aðeins fyrir þá sem sigu heldur allan mannskapinn.“

Alls voru ellefu manns í hópnum en ákvörðun var tekin um að aðeins tveir myndu siga, Haraldur og Samúel Albert Ólafsson. „Ég neita því ekki að þetta voru skrítnar tilfinningar þegar maður fór fram af, fossinn er skráður 198 metrar og því er þetta vel yfir tvær Hallgrímskirkjur.“ Ferðin niður tók rúmar tíu mínútur.

Haraldur segir að ferðin hafi verið mikil ögrun og líklega það erfiðasta sem hann hafi gert. „Þetta gerir maður bara einu sinni. Auðvitað færi ég aftur ef nauðsyn krefði en ekki bara fyrir sjálfan mig.“