Launaskrið á bankastjórum

Launakjör allra bankastjóranna nema Hreiðars Más Sigurðssonar, forstjóra KB banka, hækkuðu mikið á síðasta ári. Halldór J. Kristjánsson, bankastjóri Landsbankans, var launahæsti forstjórinn í Kauphöll Íslands með 149 milljónir króna á síðasta ári en hluti launa var uppgjör á kaupréttarsamningi sem skekkjir samanburð á milli ára.

Styrmir Þór Bragason, fyrrverandi forstjóri Atorku, fékk 200 milljónir króna í kaup á síðasta ári en þar af voru 160 milljónir króna vegna uppgjörs á kaupréttarsamningi við starfslok hans.

Sigurjón Þ. Árnason, Hreiðar Már Sigurðsson og Bjarni Ármannsson þáðu allir um og yfir áttatíu milljónir króna í laun, bónusa og hlunnindi fyrir árið 2005. Laun Sigurjóns hækkuðu um 144 prósent á milli ára og laun Bjarna um tæpan helming.

Lýður Guðmundsson, forstjóri Bakkavarar, fékk yfir 71 milljón króna og Þórður Már Jóhannesson, forstjóri Straums - Burðaráss, 64 milljónir króna.

Hannes Smárason, forstjóri FL Group, fékk 53,8 milljónir króna í laun á síðasta ári en mestan hluta ársins var hann í starfi sem starfandi stjórnarformaður samstæðunnar. Alls gegndu þrír starfi forstjóra FL Group í fyrra; Ragnhildur Geirsdóttir og Sigurður Helgason auk Hannesar. Námu launagreiðslur til forstjóra félagsins alls 113,5 milljónum króna en skuldbindingar vegna starfsloka Ragnhildar og Sigurðar nema um 238 milljónum króna.

Forstjórar framleiðslu­fyrirtækjanna Actavis, Kögunar, Marels og Össurar eru með nokkuð lægri laun en bankastjórarnir. Jón Sigurðsson, hjá Össuri, fékk 771 þúsund Bandaríkjadali, sem samsvara um 48,7 milljónum króna, og hækkuðu laun hans um 130 prósent á milli ára. Róbert Wessman þáði 504 þúsund evrur, sem jafngiltu tæpum 38 milljónum króna.

Hörður Arnarson og Gunnar Smári Egilsson voru hvor um sig með yfir 31 milljón króna.

David Baker, forstjóri Flögu, var með lægsta kaupið af forstjórum félaga í Úrvalsvísitölunni eða um 8,9 milljónir króna en þess ber að geta að hann tók við stjórnarkeflinu í apríl í fyrra.