Mótmæla verksmiðju SVN á Hjaltlandseyjum

Síldarvinnslan (SVN) í Neskaupstað hefur uppi áform um að reisa fiskimjölsverksmiðju í Sella Ness á Hjaltlandseyjum. Verksmiðjan mun kosta um 10,8 milljónir punda, jafnvirði rúmra 1,2 milljarða íslenskra króna, og miða áætlanir við að hún noti um 100.000 tonn af hráefni, aðallega kolmunna, til framleiðslu á mjöli og lýsi. Að sögn Jóhannesar Pálssonar, framkvæmdastjóra landvinnslu hjá Síldarvinnslunni, munu nokkur störf skapast með tilkomu verksmiðjunnar á Hjaltlandseyjum. Það sé þó árstíðabundið en þegar mest láti muni fimmtán manns fá störf í verksmiðjunni. Færri starfi þar á öðrum tímum. Yfirvöld á eyjunum hafa verið hlynnt framkvæmdunum og lýst yfir vilja til að verja sex milljónum punda, jafnvirði tæpra 700 milljóna íslenskra króna, til stækkunar hafnarinnar í Sella Ness í tengslum við verksmiðjuna.

Jóhannes segir að um stórt verkefni sé að ræða á Hjaltlandseyjum og hafi Síldarvinnslan átt gott samstarf við bæði yfirvöld á eyjunum og heimamenn. Hafi fyrirtækið farið í staðarval fyrir væntanlega verksmiðju í samráði við alla aðila.

Út úr staðarvalinu kom ákveðin niðurstaða og málið fór í eðlilegt ferli. Við skiluðum inn umhverfismatsskýrslu í desember og hefur hún verið auglýst. Þá eru athugasemdir komnar við hana frá opinberum aðilum og almenningi. Skipulagsyfirvöld eru að fara yfir skýrsluna og vonumst við til að úrskurður yfirvalda falli í apríl eða maí, sagði Jóhannes og bætti við að Síldarvinnslan tæki ákvörðun um framhald framkvæmdarinnar eftir að úrskurður úr umhverfismatinu lægi fyrir. Fram að þeim tíma gerðist ekki mikið.

Í vefútgáfu dagblaðsins Shetland Marine News í síðustu viku kom hins vegar fram að tafir gætu orðið á því að Síldarvinnslan reisti fiskimjölsverksmiðjuna í Sella Ness. Er ástæðan sögð mótmæli nokkurra heimamanna sem búi í nágrenni við væntanlegt verksmiðjusvæði. Kemur fram að ítarlegri upplýsinga hafi verið krafist um ýmsa umhverfisþætti, s.s. hvernig komið verði í veg fyrir mengun af völdum frárennslis frá verksmiðjunni auk þess sem óttast er að lykt og úrgangur frá verksmiðjunni laði fugla að henni, en flugvöllur Sella Ness er í námunda við væntanlega fiskimjölsverksmiðju Síldarvinnslunnar á Hjaltlandseyjum. Geti því steðjað hætta að fuglum á svæðinu.

Vegna þessa er búist við að tafir verði á að Síldarvinnslan reisi verksmiðjuna á Hjaltlandseyjum, að sögn blaðsins, og muni framkvæmdir ekki hefjast fyrr en í fyrsta lagi í sumar bregðist forsvarsmenn fyrirtækisins við öllum óskum þeirra sem skilað hafa inn athugasemdum við umhverfismatið.

Blaðið hefur eftir Alec Miller, talsmanni mótmælenda, sem býr í námunda við væntanlega fiskimjölsverksmiðju, að hann telji verksmiðjuna óhagstæða á allan hátt og vonist til að frekari áætlanir um byggingu hennar verði endanlega slegnar út af borðinu.

Jóhannes segir það eðlilegt að einhverjir séu mótfallnir framkvæmdum á borð við fiskimjölsverksmiðju. Allir aðilar hafi hins vegar skilað inn athugasemdum við umhverfismatið og bíði forsvarsmenn Síldarvinnslunnar í Neskaupsstað úrskurðar skipulagsyfirvalda á Hjaltlandseyjum. Verður í framhaldinu tekin ákvörðun um hvort af framkvæmdum verður eður ei.