Hagar selja Skeljung og kaupa í Kringlunni

Hagar hasla sér völl í sérvöruverslun á nýjan leik með kaupum á fimm verslunum í Kringlunni. Pálmi Haraldsson í Fons hafði frumkvæði að því að kaupa Shell.

Hagar hafa selt rekstur Skeljungs til Pálma Haraldssonar og Jóhannesar Kristinssonar í Fons. Félagið hefur um leið keypt fimm tískuvöruverslanir í Kringlunni af Sigurði Bollasyni og Nönnu Björk Ásmundsdóttur.

Umræddar verslanir eru sérleyfisverslanir sem eru reknar undir merkjum bresku verslanakeðjanna Karen Millen, Warehouse, All Saints, Shoe Studio Group og Whistles, en Baugur Group, stærsti hluthafi Haga, á hlutdeild í þeim öllum.

Finnur Árnason, forstjóri Haga, segir að salan á Skeljungi hafi gengið hratt fyrir sig og þar á bæ séu menn kátir með niðurstöðuna. "Við höfðum hug á því að selja hluta af Skeljungi frá okkur en þessi frágangur hafði skamman aðdraganda."

Hagar verða eftir söluna fyrst og fremst smásölufyrirtæki og áherslur fyrirtækisins verða skýrari að sögn Finns. Hann er ekki tilbúinn að gefa upp söluverðið en segir þó að verslunarrekstur Skeljungs hafi styrkst eftir að Hagar tóku hann yfir og aukið verðmæti félagsins.

Aðspurður um þau kaup sem Hagar réðust í í Kringlunni segir Finnur að félagið hafi haft hug að stækka við sig á sérvörumarkaði og kaupin séu liður í þeirri stefnu. Þessar verslanir opnuðu allar í Kringlunni á síðasta ári nema Karen Millen sem hefur verið starfrækt í nokkur ár og var áður undir merkjum NTC-verslunarkeðjunnar.

"Ég seldi Skeljung á sínum tíma til að fjármagna mín kaup í Iceland sem reyndist vera mjög happadrjúg fjárfesting og átti svo frumkvæði að því við Haga að kaupa Skeljung til baka. Við fórum í samningaviðræður og niðurstaðan er þessi," segir Pálmi Haraldsson í Fons. Gunnar Karl Gunnarsson verður áfram forstjóri Skeljungs að sögn Pálma.

Olíufélagið Esso var á dögunum selt til fjárfesta en talið er að kaupverðið hafi legið á bilinu 17-18 milljarðar króna. Skeljungur var tekinn af markaði af Steinhólum sumarið 2003 og nam markaðsvirði hans þá um tólf milljörðum króna.