Bærinn vill kaupa starfsstöðina

Halldór Halldórsson, bæjarstjóri í Ísafjarðarbæ, hefur óskað eftir viðræðum við stjórnendur Já Símaskrár, um að kaupa vinnustöð fyrirtækisins á Ísafirði. Beiðni Halldórs kemur í kjölfar þess að fyrirtækið ákvað að leggja starfsstöðina niður og flytja starfsemina annað en þar með glatast fimm störf á Ísafirði.

Halldór segist mjög ósáttur við ákvörðun stjórnenda Já Símaskrár og telur hana illa ígrundaða. Hann telur hins vegar litlu skila að mótmæla hástöfum og líklegra til árangurs að kaupa starfsstöðina, að því gefnu að bærinn sjái forsendur fyrir rekstri hennar. Hann telur mörg tækifæri í því.