Gengi hlutabréfa Flögu Group hf. hefur hríðfallið

Gengi hlutabréfa Flögu Group hf. hafa hríðfallið, eða um nær helming á síðasta árið og náðu hlutabréfin lágmarki fyrr í mánuðinum. Afkoma fyrirtækisins hefur farið versnandi á síðustu árum og áætlanir um bætta afkomu hafa ekki gengið eftir.

Þeir sem áttu hlutabréf í Flögu Group hf. hafa vafalaust ekki farið varhluta að hríðfallandi gengi hlutabréfanna en á síðastliðnu ári hefur gengið fallið úr 6 í 3,7. Dótturfélög Flögu Group hf. eru Medcare og Sleeptech. Nýtilkomnar skipulagsbreytingar ná einungis til Medcare en frá næstu mánaðarmótum verður 40 starfsmönnum fyrirtækisins sagt upp störfum. Gengi hlutabréfanna náði lágmarki sjöunda október síðastliðinn en hafa svo risið lítillega síðan. Fyrirtækið er ekki stórt á hlutabréfamarkaðinum og aðeins með nokkur viðskipti á dag. Það er því ekki óeðlilegt að nokkurra sveiflna gæti þegar verslað er með hlutabréfin. Taprekstur hefur hins vegar verið á fyrirtækinu síðastliðin tvö ár og hafa áætlanir um bætta afkomu ekki gengið eftir. Við þriggja mánaða uppgjör fyrirtækisins í apríl fyrr á þessu ári, var gert ráð fyrir að taprekstur yrði áfram í einhvern tíma en síðan myndi fyrirtækið rétta úr kútnum síðari hluta ársins. Raunin er önnur því tap hefur verið allt síðasta ár hjá fyrirtækinu.