Fær 20 milljóna starfslokasamning

Andri Teitsson, fyrrverandi framkvæmdastjóri KEA, fær tæpar tuttugu milljónir króna í starfslokasamning og stjórnarmenn í KEA höfðu fundið að einkafjárfestingum hans á meðan hann var í vinnu við fjárfestingar fyrir KEA. Fréttablaðið telur sig hafa heimildir fyrir starfslokassamningnum og fréttastofa Bylgjunnar og Stöðvar 2 hefur nú fengið heimildir fyrir því að stjórnarmenn hafi verið óánægðir með hversu lengi hann hafi verið að hrinda ýmsum ákvörðunum stjórnar í framkvæmd og einnig með persónulegar fjárfestingar hans, ekki síst í bújörðum. Þar munu vera komin trúnaðarbresturinn, sem Benedikt Sigurðarson, stjórnarformaður KEA, sagði í fyrrakvöld að væri ástæða brottvikningar Andra en ekki að hann hafi ætlað í langt fæðingarorlof. Svo mun steininn hafa tekið úr þegar Andri var í veiðitúr og stopulu símasambandi daginn sem tilboð í Símann voru opnuð í símann nýverið en KEA var í hópi fjárfesta sem átti næsthæsta tilboðið þannig að sú staða hefði getað komið upp að hópurinn fengi kost á að hækka boð sitt. Við líkar aðstæður hefðu allir stjórnendur sem að komu þurft að vera tiltækir. Fréttastofan bauð Andra í gærmorgun að bera af sér ásakanir um trúnaðarbrrt, ef þær ættu ekki við rök að styðjast, en að athuguðu máli ákvað hann að tjá sig ekki um þær. Það er því óleyst gáta hvers vegna þeir Andri og Benedikt voru sammála um þá tilkynningu sem Andri sendi frá sér um brotthvarf sitt, að það stæði í sambandi við fyrirhugað fæðingarorlof Andra.