Fjármálaeftirlitið hótar húsleit

Fjármálaeftirlitið telur að stofnfjáreigendur í Sparisjóði Hafnarfjarðar kunni að hafa brotið lög með því að mynda hóp með samstilltum aðgerðum. Eftirlitið hótar stofnfjáreigendum dagsektum og að leitað verði að gögnum, og á þau lagt hald, þyki þess þörf við upplýsingaöflun.  Á aðalfundi Sparisjóðs Hafnarfjarðar í apríl komst ný stjórn til valda. Stjórn sem tók þá afstöðu að standa ekki í vegi fyrir því ef stofnfjáraðilar vildu framselja bréf sín. Í kjölfarið hefur spurst út að að stofnfjáreigendum hafi borist tilboð upp á tæpar 50 milljónir í 200 þúsund króna hluti sína frá ónafngreindum aðila. Þá hefur sá orðrómur gengið að 30 af 47 stofnfjáreigendum hafi þegar gengið frá slíkum kaupum en því hafnar stjórn sjóðsins. Í bréfi sem stofnfjáreigendunum barst frá Fjármáleftirlitinu er vísað í lög um fjármálafyrirtæki sem kveða á um að aðilum sem hyggjast eignast virkan eignarhlut í fjármálafyrirtæki beri að leita fyrirfram samþykkis frá Fjármálaeftirlitinu. Með virkum eignarhlut er átt við beina eða óbeina hlutdeild í fyrirtæki sem haft getur veruleg áhrif á stjórnun þess. Hvers konar samstilltar aðgerðir, hverju nafni sem þær nefnist, kunni að falla undir virka eignaraðild. Það sem Fjármálaeftirlitið hefur til skoðunar er hvort virkur eignarhlutur sé til staðar í Sparisjóðnum, meðal annars með hliðsjón af aðdraganda aðalfundar sparisjóðsins, aðalfundinum sjálfum og málatilbúnaði að öðru leyti. Jafnframt vill Fjármálaeftirlitið upplýsingar um hvort stofnfjáreigendur hafi fyrirætlanir um sölu stofnfjár eða hvort slík sala hafi átt sér stað, hvort þeir hafi fengið tilboð og hvort þeim sé kunnugt um slíkt samkomulag eða tilboð. Þeim er gert að svara þessum spurningum fyrir 30. júní. Auk þess sér Fjármálaeftirlitið ástæðu til að minna stofnfjáreigendur í Sparisjóði Hafnarfjarðar á að heimilt sé að beita dagsektum og leit og hald á gögnum við upplýsingaöflun og eftirlit.