Hagnaður Símans þrefaldast

Hagnaður Símans á fyrsta ársfjórðungi þrefaldaðist á milli áranna 2004 og 2005. Hann var rúmir 1,2 milljarðar króna í ár en var á sama tímabili í fyrra 409 milljónir. Þetta kemur fram í tilkynningu frá Símanum. Þar segir einnig að Síminn hafi á tímabilinu selt öll hlutabréf sín í Straumi fjárfestingabanka hf. og nam hagnaður af sölunni eftir skatta 576 milljónum. Heildartekjur Símans jukust um 273 milljónir króna milli ára og námu rúmum fimm milljörðum á fyrsta ársfjórðungi.