Vill byggja álver í Helguvík

Norðurál hyggst reisa allt að 250 þúsund tonna álver á iðnaðarsvæði Helguvíkur í Reykjanesbæ. Skrifað var undir viljayfirlýsingu þess efnis í gærkvöldi. Viðræður hafa staðið yfir milli fulltrúa Norðuráls, Reykjanesbæjar og Hitaveitu Suðurnesja í nokkrar vikur. Árni Sigfússon, bæjarstjóri í Reykjanesbæ, segir að álver af þessari stærðargráðu muni hafa mikla þýðingu fyrir Suðurnesin. Ef niðurstöður umhverfisathugana og orkuöflunar reynist jákvæðar sé ekkert að vanbúnaði en auðvitað sé slík vinna fram undan áður en skýr ákvörðun liggi fyrir. Það sé ekkert vafamála að þetta verkefni yrði gríðarlegur styrkur fyrir Reykjanesbæ og nágrannabyggðir því það myndi stuðla að fleiri og fjölþættari störfum á svæðinu. Um leið muni stór hluti þeirrar umhverfisvænu orku sem verði til á Reykjanesinu nýtast svæðinu. Árni segir að áhersla á Helguvík sem vænlegan kost muni skila sér margfalt til baka í framtíðinni og ef þetta verkefni komi í kjölfar undirbúnings FL Group á að flytja allt eldsneyti í gegnum Helguvík þá sé ekki hægt að segja annað en að Suðurnesjamenn séu afar vel settir. Árni leggur áherslu á að Norðurál sé viðurkennt á heimsvísu hvað varðar mengunarvarnir og öryggi starfsmanna. Mikla orku þarf til að keyra álver af þessari stærð áfram og hefur Hitaveita Suðurnesja tekið þátt í undirbúningi. Árni segir að rætt sé um 150-250 þúsund tonna álver í Helguvík en til samanburðar má geta að álverið á Grundartanga er 90 þúsund tonn. Valgerður Sverrisdóttir iðnaðarráðherra hefur ítrekað lýst því yfir að það sé vilji stjórnvalda að næsta álver rísi á Norðurlandi. Aðspurður hvernig hann telji að stjórnvöld taki viljayfirlýsingunni um uppbyggingu álvers í Helguvík segir Árni að hann voni að það verði góð sátt um verkefnið. Menn hafi farið vel yfir góða staði á Suðvesturlandi og Helguvík þyki vænlegust. Þá sé á svæðinu orkufyrirtæki sem vinni orku á mjög hagkvæman og umhverfisvænan hátt. Þarna fari saman miklir kostir og hann trúi ekki öðru en að allir fagni því að þeir geti nýst ef öll umhverfisskilyrði séu sett rétt fram. - - - - - - - - - - - - - - - - - - - - - - - - - - - - - - - - - - -Fréttatilkynning 14.maí 2005Áhugi á að reisa álver í Helguvík - Samkomulag undirritað um að kanna möguleikaFulltrúar Norðuráls ehf. á Grundartanga, Reykjanesbæjar og Hitaveitu Suðurnesja hf. undirrituðu í gær samkomulag um könnun á möguleikum á rekstri álvers í Helguvík í landi Reykjanesbæjar.Í framhaldi af undirritun samkomulagsins mun strax fara af stað frekari könnun á orkuöflun, umhverfisskilyrðum og aðstöðu fyrir álver í Helguvík. Verði niðurstaða slíkra athugana jákvæð, er gert ráð fyrir að álframleiðsla gæti hafist Helguvík á tímabilinu frá 2010 til 2015.Árni Sigfússon, bæjarstjóri Reykjanesbæjar, segir að um sé að ræða afar áhugavert sóknarfæri fyrir Reykjanesbæ og nágrannabyggðir. "Reynist niðurstöður umhverfisathugana og orkuöflunar jákvæðar, verður okkur ekkert að vanbúnaði við þetta stórverkefni. Ég ítreka þó að slík vinna er framundan áður en skýr ákvörðun liggur fyrir. Þetta verkefni yrði gríðarlegur styrkur fyrir byggðararlögin hér því það myndi stuðla að mun fleiri og fjölþættari vel launuðum störfum. Að sama skapi mun stór hluti þeirrar umhverfisvænu orku sem hér verður til, nýtast svæðinu beint. Áhersla okkar á Helguvíkursvæðið mun greinilega skila sér margfalt til baka í komandi framtíð. Þetta verkefni gæti komið í kjölfar undirbúnings FL Group við að flytja allt eldsneyti sitt í gegnum Helguvík. Samkvæmt opinberum viðurkenningum er álfyrirtækið Norðurál í hópi best reknu fyrirtækja í álvinnslu í heiminum, með tilliti til áherslu á mengunarvarnir og öryggi starfsmanna. Það verður því ánægjulegt að vinna að þróun þessa verkefnis með þeim," segir Árni. Júlíus Jónsson, forstjóri Hitaveitu Suðurnesja, segir að hlutverk Hitaveitunnar sé að tryggja næga orkuöflun fyrir verkefnið og leita samstarfs við Landsnetið um flutning raforkunnar. "Við erum nú þegar samstarfsaðili við Norðurál vegna stækkunar álversins á Grundartanga og höfum átt mjög gott samstarf við Orkuveitu Reykjavíkur vegna þess verkefnis. Við væntum áframhaldandi samstarfs við þá í tengslum við Helguvík, auk Landsvirkjunar og fleiri aðila. Við lítum til þessa verkefnis sem tækifæris til arðbærrar virkjunar, sem efli atvinnulífið og stækki markaðssvæði fyrirtækisins", segir Júlíus.Craig A. Davis, forstjóri og stjórnarformaður Century Aluminum, móðurfélags Norðuráls, bendir á að þetta yrði fyrsta álverið sem Century reisir frá grunni. "Við teljum að Ísland sé ákjósanlegur vettvangur til að að framfylgja þeirri stefnu okkar að auka umsvif fyrirtækisins í samkeppnishæfum áliðnaði. Við höfum verið afar ánægðir með reynslu okkar af starfseminni á Íslandi, sérstaklega áhuga og atfylgi starfsfólks og ánægjuleg samskipti við íslensk orkufyrirtæki, banka og stjórnvöld," segir Davis.