Fádæma yfirburðir Els

Suður-Afríkumaðurinn Ernie Els hafði fádæma yfirburði á atvinnumannamóti kylfinga sem lauk í Shanghai í Kína í nótt en mótið er hluti af evrópusku mótaröðinni. Hann lék holurnar 72 á 26 höggum undir pari og var 13 höggum á undan næsta manni sem var Bretinn Simon Wakefield. Daninn Thomas Björn varð þriðji. Bandaríkjamaðurinn Tim Petrovic bar sigur úr býtum á Zürich Classic golfmótinu sem tilheyrir bandarísku mótaröðinni. Þetta er fyrsti sigur hins 38 ára gamla Bandaríkjamanns á ferlinum en það tók hann 14 ár að komast inn á mótaröðina en hann vann m.a. sem pizzasendill í millitíðinni. Petrovic og James Driscoll voru jafnir á 13 höggum undir pari og fóru í bráðabana þar sem Petrovic hafði betur strax á fyrstu holu.