Kröfur þrettánfalt hærri en eignir

Lýstar kröfur í þrotabú Fróða, stærstu tímaritaútgáfu landsins, nema rúmlega hálfum milljarði króna. Eignir í búinu eru tæplega 40 milljónir. Skiptastjóri hafnaði einu forgangskröfunni í búið sem kom frá fyrrverandi eiganda Fróða. Skiptafundur í þrotabúi Fróða, sem um árabil hefur gefið út mörg af vinsælustu tímaritum landsins, var haldinn í vikunni. Reyndar hét fyrirtækið Hugi þegar það var lýst gjaldþrota en það er aukaatriði. Lýstar kröfur í þrotabúið nema um 530 milljónum króna. Ein forgangskrafa var í búið; launakrafa frá fyrrverandi eiganda útgáfunnar, Magnúsi Hreggviðssyni, en skiptastjóri hafnaði henni. Í þrotabúinu eru til 37 milljónir króna og munu þær skiptast hlutfallslega á milli kröfuhafa. Það þýðir að óbreyttu að hver kröfuhafi fær um 7 prósent krafna sinna greidd. Stærsti kröfuhafinn er Prentsmiðjan Oddi með 170 milljóna kröfu. Það var dótturfélag Odda sem keypti öll hlutabréf Magnúsar Hreggviðssonar í Fróða í fyrra fyrir 377 milljónir króna. Útgáfurétturinn og aðrar eignir félagsins voru svo í árslok í fyrra seld Tímaritaútgáfunni Fróða en skuldirnar skildar eftir og Fróði, sem þá hét Hugi, var settur í gjaldþrot. Upphaflegt kaupverð var 330 milljónir króna en það var síðan lækkað í 310 milljónir króna. Magnús Hreggviðsson og Prentsmiðjan Oddi, eru hins vegar ósammála um verðið. Magnús telur að rétt hefði verið að greiða umtalsvert meira fyrir útgáfuréttinn og aðrar eignir og var samþykkt á skiptafundinum að fá óháða matsmenn til að meta þá kröfu og gæti það tekið nokkra mánuði. Verði samþykkt að hækka kaupverðið þá rennur það fé í þrotabúið og þýðir þá einfaldlega að kröfuhafar fái meira í sinn hlut.