Selja aðgang að sjúkrasögum

Líftæknifyrirtækin Urður, Verðandi, Skuld (UVS) og ACLARA BioSciences tilkynntu um samstarf í gær um rannsóknir á erfðaefni í krabbameinsæxlum. Ekki fékkst gefið upp hvað ACLARA mun borga UVS fyrir að nota blóð- og æxlissýni auk þess sem ACLARA mun fá aðgang að sjúkrasögu þeirra íslensku krabbameinssjúklinga sem tekið hafa þátt í íslenska krabbameinsverkefninu sem UVS hefur staðið fyrir. ACLARA mun einnig deila með UVS niðurstöðum rannsóknarinnar, sem mun bætast við gagnagrunn þeirra. Þórunn Rafnar, hjá UVS, segir að þetta sé afmarkað verkefni en möguleiki verði á framhaldi. Rannsakað verður af hverju sumir krabbameinssjúklingar bregðast við lyfjum og sumir ekki. Sérstaklega er það þekkt meðal þeirra sem hafa brjósta- eða lungnakrabbamein að sjúklingar bregðist við sumum lyfjum en ekki öðrum. Þórunn segir það mikilvægt að geta valið rétt lyf, svo ekki sé verið að gefa lyf að óþörfu. Þórunn segir að ACLARA hafi ákveðið að hefja samstarf við UVS vegna þess sýnasafns og gagnagrunns sem þau eiga. UVS hafi tekið þátt í viðamiklum krabbameinsrannsóknum og eigi því nauðsynlegan en sjaldgjæfan efnivið sem er nauðsynlegur fyrir slíkar rannsóknir. "Það er sjaldgæft að til eru áreiðanlegar klínískar upplýsingar," segir Þórunn. "Það er erfitt hjá stærri þjóðum að halda utan um þær, því það er mikil hreyfing á fólki og það týnist úr meðferðum. Hér er afmarkaður hópur af læknum sem meðhöndla krabbameinssjúka og því er hægt að fylgja sjúklingum betur eftir og athuga hvort krabbamein komi upp aftur." Líftæknifyrirtækið ACLARA starfar í Kaliforníu og sérhæfir sig í því að einstaklingsbundin lyf verði að raunveruleika. Til þess notar fyrirtækið eTag™, tækni sem mælir stöðug prótein í lífvefjum.