Styrkir steypurannsóknir

Rannsóknarstofa Línuhönnunar hefur fengið styrk frá Íbúðalánasjóði til steypurannsókna. Allmörg stór mannvirki hafa verið reist hér á landi undanfarin ár en vegna veðurfars og ekki síst notkunar á salti á vegum yfir veturinn reynir töluvert á þessi mannvirki. Steypugæðin þurfa því að vera mjög mikil. Vegna takmarkaðs aðgengis að hágæðasteinefnum hafa rakadræg "annars flokks" steinefni verið notuð og oftast með viðunandi árangri. Til dæmis hefur veðrunarþol steypu verið lítið skert. Óljóst er þó hvaða áhrif rakadræg steinefni hafa á klórleiðni og er markmið nýs verkefnis að kanna klórleiðni í steypu með steinefnum í ólíkum gæðaflokkum. Vænta má að niðurstöður þess gefi vísbendingar um hvort hægt sé að nota "annars flokks" steinefni í steypu í klórríku umhverfi.