Höfða nokkur mál á dag

Bandaríska lögmannsstofan sem safnar nú liði til að höfða skaðabótamál á hendur Íslenskri erfðagreiningu, höfðar að jafnaði nokkur slík mál á dag. Umrædd lögmannsstofa hefur auglýst eftir hluthöfum, í Íslenskri erfðagreiningu, sem vilja fara í mál við fyrirtækið vegna meintra rangra upplýsinga. Slík málaferli eru nokkuð algeng, í Bandaríkjunum. Lögmannsstofurnar fá hluta af þeim skaðabótum eða sáttagreiðslum sem um semst, og leita því með logandi ljósi eftir fólki til að höfða mál. Kári Stefánsson, forstjóri Íslenskrar erfðagreiningar telur enga ástæðu til þess að hafa áhyggjur af niðurstöðunni. Hann segir að fyrirtækið hafi það sem þungamiðju í sínu viðskiptalíkani að höfða mál á hendur fyrirtækjum sem eru á markaði án þess að hafa nokkurn vitnisburð í höndunum að eitthvað sé að. Hann segir fréttina á forsíðu DV í dag þar sem sagt sé að hluthafar Decode telji sig svikna, og þess vegna sé fyrirtækinu stefnt í Bandaríkjunum, sé algjörlega röng. Kári segir að það hafi ekki verið hluthafar sem höfuðu mál á hendur þeim heldur auglýsti þetta lögfræðifyrirtæki eftir fólki sem væri reiðubúið til að gefa sig fram sem málshefjendur í þessu máli. Kári segir að hann hafi engar áhyggjur af efni þessa máls því hann segist nokkuð viss um að fyrirtækið hafi ekki brotið nein lög, og farið hefði verið eftir þeim lögum og reglum sem lúta að bókhaldi í Bandaríkjunum og á Íslandi. Hins vegar sagðist hann hafa svolitlar áhyggjur af því að þetta muni draga athyglina frá rekstri fyrirtækisins og slík málaferli taki alltaf tíma. Hann segir þó að lögfræðingar fyrirtækisins séu góðir og að þetta eigi ekki að verða meiriháttar vandamál.