Hvolsvellingur og EM-fari í Stjörnuna

Védís er aðeins 17 ára gömul en hefur þegar leikið 42 deildarleiki og skorað í þeim 8 mörk í meistaraflokki fyrir Selfoss.  Hún skoraði 5 mörk í 18 leikjum í Lengjudeildinni í sumar og var valin í úrvalslið deildarinnar.

Védís var þar að auki í U19-landsliðshópi Íslands sem fór á lokamót EM í sumar og á að baki sex leiki fyrir liðið. Hún er einmitt við æfingar með U19-landsliðinu þessa dagana.

Védís er uppalin á Hvolsvelli og var í yngri flokkum hjá KFR eins og til að mynda tvær af þremur markahæstu landsliðskonum Íslands frá upphafi. Í tilkynningu Stjörnunnar segir að hún sé sterkur karakter með öflugan vinstri fót sem bæði geti spilað sem bakvörður og kantmaður.

„Við erum mjög ánægð að fá Védísi til okkar. Hún er ungur leikmaður en hefur þegar sýnt hvað í henni býr í meistaraflokki og verið í stóru hlutverki í sínu liði. Hún er sterkur karakter, er með góðan vinstri fót og getur leyst fleiri en eina stöðu. Hún var eftirsótt, svo það segir margt að hún velji Stjörnuna. Ég hlakka til að vinna með henni og sjá hana taka næstu skref,“ segir Óskar Smári Haraldsson, þjálfari Stjörnunnar.