„Mark­mið hjá þessum klúbbi að vinna sem flesta titla“

„Tilfinningin er bara frábær. Auðvitað gaman að hafa klárað þetta á móti KR fyrir einhverjum, hvað, fjórum, fimm, sex vikum. Ég er bara gríðarlega ánægður með tímabilið,“ sagði Gylfi skömmu áður en hann lyfti Íslandsmeistaraskildinum á loft.

Gylfi var einnig valinn besti leikmaður ársins en það eru leikmenn deildarinnar sem kusu.

„Það er búið að ganga mikið á þannig að við erum bara gríðarlega ánægðir að hafa unnið tvö ár í röð og nú byrjar bara undirbúningurinn fyrir næsta tímabil.“

Gylfi fór ekki leynt með það að stefnan væri sett á þriðja Íslandsmeistaratitilinn í röð á næsta tímabili.

„Það er bara alltaf markmið hjá þessum klúbbi að vinna sem flesta titla. Það breytist ekkert núna þótt við séum búnir að vinna tvo í röð. Markmiðið verður að vinna aftur næsta tímabil eins og hjá mörgum öðrum liðum þannig að það er bara mikil vinna fram undan, auðvitað smá hvíld en ég er bara byrjaður að hlakka til næsta tímabils.“

Víkingar náðu ekki markmiði sínu í Evrópu á þessu tímabili en meiðsli lykilleikmanna kunna að hafa sett strik í reikninginn. Gylfi segir að markmiðið verði óbreytt á næsta tímabili.

„Það var eitt af markmiðunum hjá okkur að komast í riðlakeppnina í Evrópu. Það tókst ekki en það verður bara sama markmiðið á næsta tímabili aftur. Auðvitað er það erfitt en það eru há markmið hjá klúbbnum og vonandi verður árangurinn betri í Evrópu á næsta ári.“