Norð­maðurinn fjórði en reif kjaft: „Hvaða lú­sera er ég að keppa við?“

Ingebrigtsen varð Evrópumeistari í 5.000 metra hlaupi í ágúst en er engu að síður enn að ná upp fullum styrk eftir að hafa farið í aðgerð vegna hásinarmeiðsla síðasta vetur.

Hann endaði í 4. sæti í 1.500 metra hlaupinu í gær, eftir að hafa leitt hlaupið lengst af en misst þrjá hlaupara fram úr sér á lokasprettinum.

Í stað þess að óska tvítuga Ástralanum Cameron Myers til hamingju með sigurinn, eða þeim Phanuel Koech frá Keníu og Ethan Strand frá Bandaríkjunum til hamingju með sín verðlaun, lét hann þá heyra það fyrir gunguskap í gegnum allt hlaupið.

„Allur hópurinn skíthræddur“

„Fjandinn hafi það, hvaða lúsera er ég að keppa við? Ég tapa, ég er ekki nógu góður. Ég geri heiðarlega tilraun og hleyp til að vinna, en ég er ekki nógu sterkur. Þannig er þetta svolítið núna, en þvílíkur andskotans lúserahópur,“ sagði hinn 25 ára gamli Ingebrigtsen reiður í viðtali við norska ríkismiðilinn NRK.

„Nei, þeir sitja bara og bíða og eru skíthræddir allur hópurinn. Ég hlakka svo geðveikt til að koma aftur eftir nokkra mánuði. Þá mun ég hlaupa þá alla í spað,“ sagði Ingebrigtsen við NRK. Hann lét líka móðan mása í fleiri miðlum.

Ingebrigtsen ræður vissulega engu um það hvaða tækni keppinautar hans nota í hlaupi en fannst ansi dapurt að horfa upp á aðferðir þeirra:

„Getustigið er eins og það er, en mér finnst gaman ef fólk skorar á mig þegar ég er fremstur. Að fólk geri heiðarlega tilraun og gefi í, en það var ekki vottur af því.

Nú get ég ekki talað sjálfan mig upp akkúrat í dag, en Jesús minn, þessi hópur. Hérinn [innsk.: hlaupari sem fer fremstur til að auka hraða hlaupsins] vinnur skítlélega vinnu fyrir mig. Hinir eru miklu betri en ég akkúrat núna, en Guð minn góður. Svo koma þeir einhvern veginn þegar 50 metrar eru eftir,“ hélt Ingebrigtsen áfram pirraður.

„Þá get ég hlaupið hringi í kringum þá“

Hann er staðráðinn í að komast í sitt allra besta form og láta menn finna fyrir því áður en langt um líður.

„Það er ekkert sem hvetur mig meira en að hlaupa á móti þessum hóp hér og sjá að; Ef ég bara geri það sem ég á að gera og næ að gera það sem ég á að gera, skerpi mig og tek mig saman – þá get ég hlaupið hringi í kringum þá fjandinn hafi það.“