Skúli Tómas, Herbert og Ragnar í hörkustuði á Kjarval

Magnús Jochum Pálsson skrifar 4. september 2026 14:27

Stemmingin var góð í Fantasíu á þriðjudaginn á sýningaropnun Heimsljóss. Sandra Dögg

Myndlistarmaðurinn Snorri Ásmundsson opnaði sýninguna Heimsljós í Fantasíu á Vinnustofu Kjarval í Austurstrætinu þriðjudaginn 2. september síðastliðinn. Fjöldi góðra gesta leit við á sýningaropnuninni, þar á meðal glæpasagnahöfundurinn Ragnar Jónasson, popparinn Herbert Guðmundsson og búningahönnuðurinn Dóra Einarsdóttir.

Snorri Ásmundsson er einn þekktasti myndlistarmaður landsins og hefur í gegnum árin vakið athygli fyrir bæði portrettverk sín og gjörninga, til dæmis þegar hann bauð sig fram til formanns Sjálfstæðisflokksins í fyrra.

Verkið Fugl er meðal verka á sýningunni.

„Á síðustu árum hefur Snorri, samhliða fígúratífum verkum sínum, snúið sér í auknum mæli að ljóðrænu abstraktmálverki þar sem frásögnin víkur fyrir lit, hreyfingu og tilfinningu. Sýningin markar því ákveðin tímamót á ferli Snorra, sem hingað til hefur fyrst og fremst verið þekktur fyrir gjörningalist sína og portrettverk,“ segir í kynningu á sýningunni.

Sýningarstjórar sýningarinnar eru Skúli Tómas Gunnlaugsson og Tatiana Hallgrímsdóttir. Sýningin stendur yfir til 27. október og er hluti af sýningarröð Skúla Gunnlaugssonar í Fantasíu í samstarfi við Kjarval.

Ljósmyndarinn Sandra Dögg fangaði stemminguna á opnuninni sem sjá má hér að neðan: