Golfáhrifa­valdar í klandri vegna um­deildrar aug­lýsingar

Good Good er með milljónir fylgjenda á samfélagsmiðlum og hefur verið framarlega í vaxandi hópi golfáhrifavalda á Youtube á undanförnum árum.

Ný auglýsing fyrir Callaway-dræver merktan Good Good mæltist hins vegar álíka vel fyrir og snara sem er nefnd í hengds manns húsi. Í henni sást Garrett Clark, forsprakki hópsins, hrinda konu í jörðina þegar hún reynir að taka dræverinn úr golfpoka.

„Ekki snerta nýja dræverinn minn,“ segir Clark þar sem hann stendur yfir Alexis Miestowski, liðskonu Good Good.

Viðbrögðin við auglýsingunni voru slík að Good Good og Callaway fjarlægðu hana seint á föstudag. Þeir sem töldu auglýsinguna ekki beinlínis ýta undir kynbundið ofbeldi voru á því að hún væri bæði ófyndin og léleg.

„Það krefst svo margra heimskulegra ákvarðana að þetta líti dagsins ljós,“ skrifaði Kevin van Valkenburg, blaðamaður hjá golfmiðlinum Fried Egg, sem furðaði sig á að enginn sem tengdist Good Good og Callaway hefði áttað sig á að þetta væri ekki besta leiðin til þess að selja golfkylfu.

„Ekki að ég vilji gera þetta að stórmáli en hvað í ósköpunum á ungum stúlkum að finnast þegar þær sjá eitthvað eins og þetta?“ skrifaði Claire Rogers, blaðakona hjá Skratch Golf.

Tvær afsökunarbeiðnir

Good Good baðst afsökunar á að auglýsingin sem birtist hefði ekki samræmst gildum þeirra sem vörumerkis. Callaway sagðist hafa orðið „fyrir vonbrigðum“ með auglýsinguna en að fyrirtækið væri ánægt með að Good Good hefði brugðist hratt og vel við.

Þessar afsökunarbeiðnir þóttu heldur mélkisulegar, svo mjög að bæði Good Good og Callaway báðust aftur afsökunar á auglýsingunni í gær. Þar viðurkenndi Chip Brewer, forstjóri Callaway, að þó að Good Good hefði framleitt auglýsinguna þá hefði fyrirtæki hans gefið grænt ljós á hana.

„Það hefði aldrei átt að samþykkja þetta. Mistök áttu sér stað og við tökum þessu máli mjög alvarlega,“ sagði í yfirlýsingu Brewer sem var birt síðla kvölds.

Matt Kendrick, forstjóri Good Good, sagði í sinni yfirlýsingu að auglýsingin hefði átt að vera vísun í hryllingsmyndina „Obsession“ en hún hefði misst marks.

PGA-mót kennt við Good Good í nóvember

Uppákoman er ekki síst óheppileg fyrir Callaway þar sem fyrirtækið er opinber bakhjarl LPGA-mótaraðar kvenna. Hún setur PGA-mótaröðina einnig í snúna stöðu því mót sem verður haldið í Texas í nóvember verður kennt við Good Good.

Brian Rolapp, forstjóri PGA-mótaraðarinnar, sagði hvorki Callaway né Good Good hafa axlað nægilega ábyrgð á mistökunum í upphafi en að seinni afsökunarbeiðnirnar hefðu verið nær lagi.

„Þetta er svolítið breytileg staða. Við urðum fyrst fyrir vonbrigðum. Það hljómar eins og þeir hafi náð vissum árangri síðasta sólarhringinn. Við höldum áfram að fylgjast með stöðunni, sjá hvernig hún þróast,“ sagði Rolapp á blaðamannafundi í gær þar sem hann var spurður út í Good Good-mótið.