UEFA mun ræða sniðgöngu á HM á neyðarfundi

UEFA ætlar að halda neyðarfund með 55 aðildarsamböndum sínum í þessari viku.

FIFA vinnur með alþjóðlega fjármálaþjónustufyrirtækinu J.P. Morgan og meðal fjárfesta væri Thrive Eternal, sem var stofnað af Joshua Kushner, en bróðir hans, Jared Kushner, er tengdasonur Donalds Trump, forseta Bandaríkjanna.

UEFA brást skjótt við áætlununum á þriðjudag og sagði að íþróttin væri „ekki til sölu hjá FIFA“. FIFA gæti aflað tuttugu milljarða dala með sölu á hlutafé heimsmeistaramótsins til utanaðkomandi fjárfesta og ljóst er að Infantino sjálfur myndi væntanlega hagnast verulega sjálfur á slíkum viðskiptum.

Heimildarmenn erlendra miðla segja að mikil andstaða væri innan UEFA gegn tillögum FIFA.

„UEFA tekur þetta afar alvarlega. Það sama ætti að eiga við um knattspyrnusambönd allra landa. Það sama á við um alla hagsmunaaðila sem láta sig framtíð íþróttarinnar varða,“ segir í yfirlýsingunni og beinir þar af leiðandi orðum sínum til KSÍ og annarra knattspyrnusambanda ríkja víða um heim.

„Sál og stjórnun knattspyrnunnar eru ekki eignir til að eiga viðskipti með – sérstaklega þar sem ekkert gagnsæi er um hverjir hagnast fjárhagslega. Enginn okkar á knattspyrnuna. Það er ekki FIFA að selja hana.“

Erlendir miðlar segja að mjög líklegt væri að fjarfundur yrði haldinn fyrir lok vikunnar.

FIFA hætti við tillögu árið 2021 um að halda heimsmeistaramótið á tveggja ára fresti vegna hótunar um sniðgöngu af hálfu UEFA og búist er við að sami fælingarmáttur verði notaður til að berjast gegn nýjustu áætlun FIFA.