Mikil tíðindi í nýrri fylgiskönnun Maskínu

Ástarsvik hafa verið sérstaklega algeng hér á landi síðustu vikur samkvæmt upplýsingum frá bönkunum. Teymisstjóri hjá Bjarkarhlíð segir allt of fáa þolendur leita sér hjálpar. Afleiðingarnar geti verið skelfilegar; sumir hafi tapað aleigunni og aðrir skuldsett sig um margar milljónir króna. Tómas Arnar fjallar um málið.

Sviðsstjóri hjá Minjastofnun biður Reykjavíkurborg um að flýta sér hægt áður en áhorfendastúkan í Laugardalslaug verður rifin. Hann segir stúkuna hafa mikið varðveislugildi í menningarsögu Íslands.

Þrjú spænsk herskip eru komin til Íslands vegna verkefnis Atlantshafsbandalagsins á Norður-Atlantshafi. Skipunum er meðal annars ætlað að fylgjast með sæstrengjum, orkuinnviðum og mikilvægum siglingaleiðum. Yfirmaður verkefnisins, sem hóf feril sinn á tímum kalda stríðsins, segir heiminn aftur orðinn flóknari en treystir NATO til að aðlagast breyttum aðstæðum eins og áður.

Í íþróttum verður sagt frá draumabyrjun Elínar Klöru Þorkelsdóttur á atvinnumannaferlinum og áframhaldandi Evrópuvegferð Víkinga.