Infantino veður­tepptur og Spánn hætti við æfingu

Infantino hefur mætt á nær alla leiki HM í sumar en sást hvergi í stúkunni þegar England vann 6-4 sigur gegn Frakklandi í leiknum um þriðja sætið í gær.

Veðuraðstæður í New York leiddu til þess að flugi Infantino var aflýst og forsetinn sat veðurtepptur á skrifstofum FIFA í Trump turni. Hann hafði flogið til New York á föstudeginum til að halda blaðamannafund með Donald Trump, Bandaríkjaforseta.

Vegna þrumuveðursins og eldingahættu þurfti spænska landsliðið líka að hætta við æfingu, síðustu æfingu liðsins fyrir úrslitaleikinn í kvöld gegn Argentínu, sem var upphaflega frestað en síðan aflýst. Leikmenn færðu sig inn í lyftingarsal.

Spænska landsliðið lenti líka í vandræðum vegna veðurs á fimmtudag en þá æfðu leikmenn í hættulegum aðstæðum af völdum loftmengunar vegna skógarelda. Lamine Yamal var að glíma við áverka síðan í undanúrslitaleiknum gegn Frakklandi og tók lítinn þátt í þeirri æfingu.

Argentínska landsliðið æfði í Atalanta á fimmtudag en flaug til New York á föstudag og rétt slapp við eldingaviðvörunina í gær. Argentína náði að æfa, eftir frestun, á velli í um 8 kílómetra fjarlægð frá æfingasvæði Spánar.

Búist er við betra veðri þegar úrslitaleikur HM fer fram í kvöld en líklega mun rigna töluvert í dag í aðdraganda leiksins. Fylgst verður grannt með framþróun mála en ekki er búist við töfum eða frestun á úrslitaleiknum.