Alltaf jafn ó­þægi­legt að heyra af ná­lægri á­rás

„Þetta er um fjórum kílómetrum frá því þar sem ég á heima. Ég til dæmis fer í strætó þarna framhjá á hverjum degi,“ segir Ólöf Hulda Ágústudóttir sem er á tuttugasta aldursári og býr í Nørresundby ásamt fjölskyldu sinni. Hún var heima þegar fregnir bárust af skotárásinni.

Ólöf segir reglulega fjallað um átök milli glæpahópa í borginni en lögreglan hafi nú gefið út málið tengist ekki slíkum átökum.

„Það eru alveg klíkur hérna í Álaborg og maður hefur alveg heyrt inn á milli um bæði stunguárásir og skotárásir.“

Málinu ekki lokið að hálfu lögreglu

Þrátt fyrir að slík mál hafi komið upp áður segir Ólöf það alltaf jafn óþægilegt þegar fréttir berast af slíku ofbeldi.

„Maður verður alveg óöruggur, sérstaklega á kvöldin.“ Ekki hjálpi nú þegar ekki liggur fyrir hvers vegna maðurinn hleypti af skotum. Ólöf lauk nýverið framhaldsskóla í Danmörku.

Árásarmannsins var víða leitað í dag og vegum lokað. Ólöf og móðir hennar reyndu að fara í verslun nálægt vettvangi fjórum tímum síðar en komust ekki þangað þar sem gata var enn lokuð. Ólöf segir að lögreglan hafi gefið út að hún verði til staðar fram á nótt vegna málsins.