Blikarnir brunuðu í undan­úr­slit bikarsins

Ægismenn slógu óvænt KA út í sextán liða úrslitum en hafa aðeins unnið tvo af fyrstu átta deildarleikjum sínum í sumar. Flestir bjuggust við öruggum útisigri sem varð líka raunin.

Þetta er í fyrsta sinn í þrjú ár sem Blikar komast í undanúrslit og í níunda sinn alls á þessari öld.

Ægismenn máttu sín lítils gegn sterku Blikaliði og ekki hjálpaði til að fyrsta markið var sjálfsmark Ægismanna.

Stefan Dabetic setti boltann í eigið mark strax á áttundu mínútu eftir sendingu frá Óla Val Ómarssyni.

Viktor Karl Einarsson, sem bar fyrirliðabandið í kvöld, bætti við öðru marki Blika fjórum mínútum fyrir hálfleik og Ágúst Orri Þorsteinsson skoraði þriðja markið eftir rúmlega klukkutíma leik. Aron Bjarnason lagði upp bæði mörkin.

Þetta er aðeins í annað skiptið sem Ægir kemst svo langt í bikarnum en liðið tapaði á móti KA í átta liða úrslitum 2022.