Guð­jón Valur þjálfari ársins í Þýska­landi

Það eru þjálfarar og stjórnendur í deildinni sem koma að kosningunni og hefur Guðjón Valur nú verið heiðraður fyrir hreint út sagt magnað tímabil með sínu liði.

Þetta er í annað sinn sem Guðjón hlýtur þennan heiður en hann var einnig valinn árið 2023.

Þýska deildin hefur valið þjálfara ársins frá árinu 2002 þegar Alfreð Gíslason, þá þjálfari Magdeburg, var valinn. Guðjón er fjórði Íslendingurinn sem hlýtur þennan heiður því Dagur Sigurðsson var valinn 2011 og Guðmundur Guðmundsson 2014. Alfreð hlaut nafnbótina alls fjórum sinnum, þar af þrisvar með Kiel.

Þess ber þó að geta að Handball-Magazin valdi þjálfara ársins á árunum 1984-2013 og varJóhann Ingi Gunnarsson valinn árið 1986en Alfreð Gíslason 2001, 2009, 2011, 2012 og 2013.

Lokaumferðin í þýsku deildinni er um helgina en ljóst er að Gummersbach endar í 4. sæti, fyrir ofan lið á borð við Kiel, Lemgo, Evrópudeildarmeistara Melsungen og Rhein-Neckar Löwen. Liðið endar skammt á eftir Flensburg og Füchse Berlín en Magdeburg hafði yfirburði í deildinni og hefur aðeins tapað einum leik á tímabilinu.

Guðjón Valur tók við Gummersbach árið 2020, þegar það var í næstefstu deild, og hóf þetta gamla stórveldi upp í efstu deild og nú í hóp fjögurra bestu liða Þýskalands. Ljóst er að liðið leikur í Evrópudeildinni á næstu leiktíð.

Forráðamenn Gummersbach hafa verið hvattir til að gera sem fyrst nýjan samning við Guðjón Val, í ljósi þess að evrópsk stórlið hljóti nú að vera með hann í sigtinu, en sjálfur kveðst þessi fyrrverandi landsliðsfyrirliði Íslands pollrólegur yfir stöðunni.

Hjá Gummersbach er Guðjón Valur með tvo íslenska lærisveina, þá Elliða Snæ Vignisson og Teit Örn Einarsson.